ഗോവയില്‍ ചെന്നൈ തകര്‍ത്താടി; ചെന്നൈ 4- ഗോവ 0

ഫറ്റോര്‍ഡ (ഗോവ): ഒടുവില്‍ ആധികാരിക ജയത്തോടെ ചെന്നൈയ്ന്‍ എഫ്.സി അക്കൗണ്ട് തുറന്നു. ഐ.എസ്.എല്ലില്‍ ഇന്നലെ നടന്ന മല്‍സരത്തില്‍ ശക്തരായ എഫ്.സി ഗോവയെ എതിരില്ലാത്ത നാലു ഗോളുകള്‍ക്ക് തകര്‍ത്താണ് പുതിയ സീസണിലെ ആദ്യ ജയം ചെന്നൈ ആഘോഷിച്ചത്.

ഈ സീസണിലെ ആദ്യ ഹാട്രിക്ക് വീരനായ മെന്‍ഡോസ വലന്‍സിയയുടെ മികവാണ് ചെന്നൈക്ക് വമ്പന്‍ ജയം നേടിക്കൊടുത്തത്. 10, 63, 75 മിനിറ്റുകളിലാണ് കൊളംബിയന്‍ സ്‌ട്രൈക്കര്‍ ചെന്നൈക്കു വേണ്ടി ഹാട്രിക്ക് പൂര്‍ത്തിയാക്കിയത്. എലാനോയാണ് (43ാം മിനിറ്റ്) ചെന്നൈയുടെ മറ്റൊരു ഗോള്‍ സ്‌കോറര്‍.