കോപ്പിയടിച്ച ഐജിയെ സര്‍വകലാശാല ഒരു വര്‍ഷത്തേക്ക് വിലക്കി

കോട്ടയം: എല്‍ എല്‍ എം പരീക്ഷയ്ക്ക് കോപ്പിയടിച്ച ഐജി ടിജെ ജോസിനെ ഒരു വര്‍ഷത്തേക്ക് ഡീബാര്‍ ചെയ്യുവാനും എഴുതിയ എല്ലാ പരീക്ഷകളും റദ്ദാക്കാനും സര്‍വകലാശാല സിന്‍ഡിക്കേറ്റ് തീരുമാനിച്ചു.സിന്‍ഡിക്കേറ്റ്് നടത്തിയ അന്വേഷണത്തില്‍ കോപ്പിയടി സ്ഥിരീകരിച്ചതിനെ തുടര്‍ന്നാണ് നടപടി. ഈ വര്‍ഷം മെയ് മാസത്തില്‍ കളമശ്ശേരി സെന്റ് പോള്‍സ് കോളേജില്‍ നടത്തിയ എല്‍.എല്‍.എം പരീക്ഷയിലാണ് ഐജി ജോസ് കോപ്പിയടിച്ചത്.
ഐജിക്കെതിരായ ആരോപണം ശരിവെച്ച് സിന്‍ഡിക്കേറ്റ് അംഗം അബ്ദുള്‍ ലത്തീഫ് അധ്യക്ഷനായ ഉപസമിതി വിസിക്ക് സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തിലാണ്് സിന്‍ഡിക്കേറ്റിന്റെ തീരുമാനം. ഐജി കോപ്പിയടിച്ചുവെന്ന ഇന്‍വിജിലേറ്ററുടെ മൊഴിയാണ് കേസില്‍ നിര്‍ണായകമായത്.