കാരശ്ശേരി വൈശ്യംപുറത്ത് രണ്ടര അടി നീളമുള്ള വടിവാള്‍ കണ്ടെത്തി

മുക്കം: കാരശ്ശേരി പഞ്ചായത്തിലെ വൈശ്യംപുറം ഭാഗത്ത് വടിവാള്‍ കണ്ടെത്തി. സ്വകാര്യ വ്യക്തിയുടെ സ്ഥലത്ത് തൊഴിലുറപ്പ് തൊഴിലാളികള്‍ മണ്ണ് നീക്കം ചെയ്യുന്നതിനിടെയാണ് രണ്ടര അടിയോളം നീളമുള്ള വടിവാള്‍ കണ്ടത്. ഏറെക്കാലത്തെ പഴക്കമുള്ളതാണന്ന് കരുതുന്ന വാള്‍ മണ്ണിനടിയില്‍ കിടന്ന് പൂര്‍ണ്ണമായും തുരുമ്പിച്ച നിലയിലാണ്.
വാളിന്റെ പിടിയില്‍ പിടിക്കാന്‍ പാകത്തിന് തുണി ചുറ്റിയതായും കാണാം. നാട്ടുകാര്‍ വിവരമറിയിച്ചതിനെ തുടര്‍ന്ന് മുക്കം പോലീസ് സ്ഥലത്തെത്തി വാള്‍ കസ്റ്റഡിയിലെടുത്തു. പോലീസ് കേസെടുത്ത് അന്വേഷണമാരംഭിച്ചു.  വാള്‍ കണ്ടെത്തിയത് നാട്ടുകാരെ  ആശങ്കയിലാഴ്ത്തിയിട്ടുണ്ട്.