കര്‍ണാടക: രണ്ട് കോണ്‍ഗ്രസ് എംഎല്‍എമാര്‍ ക്യാംപില്‍ തിരിച്ചത്തി

ബംഗളൂരു: കര്‍ണാടകയില്‍ ഇന്ന് വൈകീട്ട് നാലുമണിക്ക് വിശ്വാസവോട്ട് നടക്കാനിരിക്കെ രണ്ട് എംഎല്‍എമാര്‍ കോണ്‍ഗ്രസ് ക്യാംപില്‍ തിരിച്ചെത്തിയതായി റിപോര്‍ട്ട്. ആനന്ദ് സിങും പ്രതാപ് പാട്ടിലുമാണ് തിരിച്ചെത്തിയത്. അതിനിടെ ഹൈദരാബാദിലായിരുന്ന എംഎല്‍എമാരെല്ലാം ബംഗളൂരുവില്‍ തിരിച്ചെത്തിയിട്ടുണ്ട്.



അതേസമയം, ഇന്നലെ രണ്ട് ജെഡിഎസ് എംഎല്‍എമാരും ഒരു കോണ്‍ഗ്രസ് എംഎല്‍എയും ബിജെപി പക്ഷത്തേക്കു പോയി. തങ്ങളുടെ എംഎല്‍എമാര്‍ ബിജെപി പക്ഷത്തേക്കു പോയത് ജെഡിഎസ് അധ്യക്ഷന്‍ എച്ച് ഡി കുമാരസ്വാമി സ്ഥിരീകരികരിക്കുകയും ചെയ്തിരുന്നു. എന്നാല്‍, കോണ്‍ഗ്രസ് എംഎല്‍എയുടെ കാര്യത്തില്‍ വ്യക്തത വന്നിട്ടില്ല.118 അംഗങ്ങളുടെ പട്ടികയാണ് കോണ്‍ഗ്രസ്സും ജെഡിഎസും നേരത്തേ ഗവര്‍ണര്‍ക്ക് സമര്‍പ്പിച്ചിരുന്നത്. ഒരു സ്വതന്ത്രന്‍ ഉള്‍പ്പെടെ 105 പേരുടെ പിന്തുണയാണ് ബിജെപിക്കുണ്ടായിരുന്നത്. 112 പേരുടെ പിന്തുണയാണ് ഭൂരിപക്ഷത്തിനു വേണ്ടത്. കോണ്‍ഗ്രസിലെ ലിംഗായത്തുകാരായ എംഎല്‍എമാരെ കൂടി തങ്ങളുടെ പക്ഷത്ത് എത്തിക്കാനുള്ള ശ്രമത്തിലാണ് ബിജെപി. ലിംഗായത്തുകാരനായ ബി എസ് യെദ്യൂരപ്പ ലിംഗായത്ത് മഠങ്ങളെ ഉപയോഗിച്ച് ഇതിനുള്ള ശ്രമങ്ങള്‍ തുടങ്ങിയിട്ടുണ്ട്.