ഏഷ്യാ കപ്പ് ക്രിക്കറ്റ് ഫൈനല്‍: ഇന്ത്യക്ക് 121 റണ്‍സ് വിജയലക്ഷ്യം

ധക്ക: ഏഷ്യാ കപ്പ് ക്രിക്കറ്റില്‍ ആറാം കിരീടമുയര്‍ത്താന്‍ ഇന്ത്യക്ക് വേണ്ടത് 121 റണ്‍സ്. മഴയും ശക്തമായ കാറ്റും മൂലം രണ്ട് മണിക്കൂറോളം വൈകി ആരംഭിച്ച ഇന്ത്യ-ബംഗ്ലാദേശ് കലാശപ്പോരാട്ടം ഒടുവില്‍ 15 ഓവര്‍ ആയി ചുരുക്കി ആരംഭിക്കുകയായിരുന്നു.
ടോസ് നഷ്ടപ്പെട്ട് ആദ്യം ബാറ്റ് ചെയ്ത ആതിഥേയര്‍ നിശ്ചിത ഓവറില്‍ അഞ്ച് വിക്കറ്റിന് 120 റണ്‍സാണ് നേടിയത്. 13 പന്തില്‍ രണ്ട് വീതം സിക്‌സറും ബൗണ്ടറിയും ഉള്‍പ്പെടെ പുറത്താവാതെ 33 റണ്‍സെടുത്ത മഹ്മൂദുല്ലയാണ് ബംഗ്ലാദേശിന്റെ ടോപ്‌സ്‌കോറര്‍. സാബിര്‍ റഹ്മാന്‍ (32*), സാക്വിബുല്‍ ഹസന്‍ (21) എന്നിവരും ബംഗ്ലാദേശിനായി ഭേദപ്പെട്ട പ്രകടനം നടത്തി. 29 പന്തില്‍ രണ്ട് ബൗണ്ടറിയുള്‍പ്പെടുന്നതാണ് സാബിറിന്റെ ഇന്നിങ്‌സ്.
ഇന്ത്യക്കു വേണ്ടി ആര്‍ അശ്വിന്‍, ആശിഷ് നെഹ്‌റ, ജസ്പ്രിത് ബുംറ, രവീന്ദ്ര ജഡേജ എന്നിവര്‍ ഓരോ വിക്കറ്റ് വീതം വീഴ്ത്തി.