എസ്‌സി-എസ്ടി ഓര്‍ഗനൈസേഷന്‍ സംസ്ഥാന സമ്മേളനം

കോഴിക്കോട്: ദലിതുകളെ ഇല്ലാതാക്കാനാണ് ബ്രാഹ്മണ്യം ശ്രമിക്കുന്നതെന്നു പുരുഷന്‍ കടലുണ്ടി എംഎല്‍എ. ടൗണ്‍ഹാളില്‍ സംഘടിപ്പിച്ച ഓള്‍ ഇന്ത്യാ കോണ്‍ഫെഡറേഷന്‍ ഓഫ് എസ്‌സി-എസ്ടി ഓര്‍ഗനൈസേഷന്‍ (എഐസിഎസ്എസ്ഒ) സംസ്ഥാന സമ്മേളനത്തില്‍ സംസാരിക്കുകയായിരുന്നു അദ്ദേഹം. സ്വാതന്ത്ര്യം കിട്ടി ദശകങ്ങള്‍ കഴിഞ്ഞിട്ടും രാജ്യത്തെ ദലിതുകള്‍ സ്വന്തം തുപ്പല്‍ നിലത്തു വീണ് അശുദ്ധമാവാതിരിക്കാന്‍ കഴുത്തില്‍ കോളാമ്പി കെട്ടി നടക്കേണ്ട ഗതികേടിലാണ.് ദലിത്-പിന്നാക്ക ജനവിഭാഗങ്ങളെ അടിച്ച് കൊലപ്പെടുത്തുന്നതും ദലിത് സ്ത്രീകളെ ബലാല്‍സംഗം ചെയ്യുന്നതും രാജ്യത്ത് നിത്യസംഭവങ്ങളായിട്ടുണ്ട്. ഭരണഘടനയ്ക്കു പകരം മനുസ്മൃതി കൊണ്ടുവരാനാണ് ശ്രമം നടക്കുന്നത്. എല്ലാ വിഭാഗം ജനങ്ങള്‍ക്കും അന്തസ്സോടെ ജീവിക്കാന്‍ കഴിയണമെങ്കില്‍ ജനാധിപത്യമെന്താണെന്ന് മുഴുവന്‍ ജനങ്ങളെയും പഠിപ്പിക്കണമെന്നും എംഎല്‍എ പറഞ്ഞു.