എട്ട് മാസം പ്രായമായ കുഞ്ഞ് ഓട്ടോയില്‍ കാറിടിച്ച് തെറിച്ചുവീണു മരിച്ചു

ഉദുമ: ഓട്ടോയില്‍ കാറിടിച്ച് എട്ടു മാസം പ്രായമുള്ള കുഞ്ഞ് മാതാവിന്റെ കൈയില്‍ നിന്നു പുറത്തേക്ക് തെറിച്ചുവീണു മരിച്ചു. ബേക്കല്‍ മീത്തല്‍ മൗവ്വലിലെ ശരീഫ്-ഫസീല ദമ്പതികളുടെ മകന്‍ മുഹമ്മദ് നയാനാണ് മരിച്ചത്. ഇന്നലെ ഉച്ചയ്ക്ക് 2 മണിയോടെ പാലക്കുന്ന് ജങ്ഷനിലാണ് അപകടം.
കാര്‍ യൂടേണ്‍ എടുത്തപ്പോള്‍ ഓട്ടോയില്‍ ഇടിക്കുകയായിരുന്നു. ഓട്ടോ മറിഞ്ഞപ്പോള്‍ കുട്ടി മാതാവിന്റെ കൈയില്‍ നിന്നു പുറത്തേക്കു തെറിച്ചുവീഴുകയായിരുന്നു. ഓട്ടോ യാത്രക്കാരായ ആയിശ (45), ഫാത്തിമ (10) എന്നിവര്‍ക്ക് പരിക്കേറ്റു. ബേക്കല്‍ പോലിസ് കേസെടുത്തു.