ആര്‍എസ്എസ് പ്രവര്‍ത്തകന്റെ കൊല : ഗുരുവായൂര്‍, മണലൂര്‍ മണ്ഡലങ്ങളില്‍ ഇന്ന് ബിജെപി ഹര്‍ത്താല്‍

തൃശൂര്‍: ഗുരുവായൂര്‍ നെന്മേനിയില്‍ ആര്‍എസ്എസ് പ്രവര്‍ത്തകനെ വെട്ടിക്കൊലപ്പെടുത്തിയതില്‍ പ്രതിഷേധിച്ച്  ഇന്ന് ഗുരുവായൂര്‍, മണലൂര്‍ നിയമസഭാ നിയോജകമണ്ഡലങ്ങളില്‍ ബി.ജെ.പി ഹര്‍ത്താലിന് ആഹ്വാനം ചെയ്തിട്ടുണ്ട്. രാവിലെ 6 മുതല്‍ വൈകീട്ട് ആറുവരേയാണ് ഹര്‍ത്താല്‍.  പ്രതിഷേധത്തിന്റെ ഭാഗമായി വ്യാപകമായി വാഹന ഗതാഗതവും തടസ്സപ്പെടുത്തി. പാവറട്ടി, മുല്ലശ്ശേരി മേഖലകളിലാണ് പ്രവര്‍ത്തകര്‍ വാഹനങ്ങള്‍ തടഞ്ഞത്. ഇതില്‍ പ്രതിഷേധിച്ച് ഇന്നലെ വൈകീട്ടോ ചാവക്കാട്-കാഞ്ഞാണി റൂട്ടില്‍ സ്വകാര്യ ബസുകള്‍ സര്‍വീസ് നിര്‍ത്തിവെച്ചു. സി.പി.എം പ്രവര്‍ത്തകന്‍ ഫാസിലിനെ നാലുവര്‍ഷങ്ങള്‍ക്ക് മുമ്പ് കൊലപ്പെടുത്തിയ കേസിലെ രണ്ടാം പ്രതിയാണ് ഇന്നലെ രാവിലെ വെട്ടേറ്റ് മരിച്ച ആനന്ദന്‍(26). കൊലപാതകത്തില്‍ പ്രതിഷേധിച്ച് ഇന്നലെ വൈകീട്ട് ജില്ലയിലെ വിവിധ കേന്ദ്രങ്ങളില്‍ ബി.ജെ.പി-ആര്‍.എസ്.എസ് പ്രവര്‍ത്തകര്‍ പ്രതിഷേധ പ്രകടനങ്ങള്‍ സംഘടിപ്പിച്ചു.  സംഘര്‍ഷാവസ്ഥ കണക്കിലെടുത്ത് തൃശ്ശൂര്‍ റേഞ്ച് ഐ.ജി. അജിത്കുമാര്‍, തൃശ്ശര്‍ റൂറല്‍ എസ്.പി. യതീഷ്ചന്ദ്ര, ഗുരുവായൂര്‍ അസി: പോലിസ് കമ്മീഷണര്‍ പി.എ. ശിവദാസ്, ഗുരുവായൂര്‍ ടെമ്പിള്‍ സര്‍ക്കിള്‍ ഇന്‍സ്‌പെക്ടര്‍ യു.എച്ച്. സുനില്‍ദാസ്, ഗുരുവായൂര്‍ സര്‍ക്കിള്‍ ഇന്‍സ്‌പെക്ടര്‍ ഇ. ബാലകൃഷ്ണന്‍, പേരാമംഗലം സര്‍ക്കിള്‍ ഇന്‍സ്‌പെക്ടര്‍ ബി. സന്തോഷ് തുടങ്ങിയവരുടെ നേതൃത്വത്തില്‍ പോലിസ് സംഘം സ്ഥലത്ത് ക്യാംപ് ചെയ്യുന്നുണ്ട്.