'അഡ്വക്കറ്റ് ജനറലിന്റെ ജോലി മന്ത്രിമാരുടെ താല്‍പര്യം സംരക്ഷിക്കലല്ല'

കൊച്ചി: മാര്‍ത്താണ്ഡം കായല്‍ കൈയേറ്റക്കേസില്‍ സ്‌റ്റേറ്റ് അറ്റോര്‍ണി കെ വി സോഹന്‍ തന്നെ ഹാജരാവുമെന്നും അഡ്വക്കറ്റ് ജനറലിന്റെ ജോലി മന്ത്രിമാരുടെ താല്‍പര്യം സംരക്ഷിക്കലല്ലെന്നും അഡ്വക്കറ്റ് ജനറല്‍ സി പി സുധാകരപ്രസാദ്. അഡ്വക്കറ്റ് ജനറല്‍ രഞ്ജിത്ത് തമ്പാനെ നിയോഗിക്കണമെന്നാവശ്യപ്പെട്ട് റവന്യൂ മന്ത്രി എജിക്ക് കത്ത് നല്‍കിയെന്ന വാര്‍ത്തയോട് പ്രതികരിക്കുകയായിരുന്നു അദ്ദേഹം. സര്‍ക്കാരിന്റെ താല്‍പര്യമാണ് സംരക്ഷിക്കപ്പെടേണ്ടത്്. തോമസ് ചാണ്ടിയുമായി ബന്ധപ്പെട്ട കേസില്‍ ഹാജരാവാന്‍ ചുമതലപ്പെടുത്തിയത് സ്‌റ്റേറ്റ് അറ്റോര്‍ണിയെയാണ്. അദ്ദേഹം തുടരും. അദ്ദേഹത്തെ മാറ്റാന്‍ ആവശ്യപ്പെട്ട് റവന്യൂ മന്ത്രിയുടെ കത്ത് ലഭിച്ചിട്ടുണ്ടോയെന്ന കാര്യത്തില്‍ പ്രതികരിക്കുന്നില്ലെന്നും ചോദ്യത്തിന് മറുപടിയായി എജി പറഞ്ഞു. രഞ്ജിത് തമ്പാനുമായി സംസാരിച്ചു. അദ്ദേഹത്തിന് ഒരു അതൃപ്തിയുമില്ല. മറ്റെല്ലാം മാധ്യമങ്ങള്‍ നിറംകൊടുക്കുന്ന പ്രചാരണങ്ങളാണെന്നും എജി പറഞ്ഞു.